العاصمة الجديدة

المواطن بسيط يذهب الى موقف الميكروباصات.

بسيط : العاصمة الجديدة يا اسطى.

–السائق : ايوه يا استاذ….اتفضل اقعد على الكرسى القلاب عشان نمشى.

بسيط : لا يا عم انا هتزنق راجع ورا ..مش هقعد على الكرسى القلاب انا.. وكل شويه انزل عشان واحد ينزل.. واطلع عشان واحد يطلع.

السائق : الكلام ده كان زمان يا استاذ..لا فى حد بينزل ولا حد بيطلع .كلة نازل الاخر لما نوصل العاصمة الجديدة.

بسيط يصل الى العاصمة الجديدة وينظر بإنبهار الى مبانيها الشاهقة. وحدائقها الواسعة… ويستوقف احد العاصميين الجدد لسؤاله.

بسيط : لو سمحت يا بشمهندز… اروح مجمع التحرير الجديد منين..هو مش عند صينيه كبيرة برضه.

العاصمى الجديد : خلاص مفيش لا صوانى ولا كوبيات هنا مفيش غير تقاطعات ..امشى على طول هتلاقية فى وشك.

العاصمى الجديد يتمتم بصوت منخفض ..احنا مش كنا خلصنا من الاشكال دى ..!! .

بسيط بعد وصولة لقسم الجوازات بالمجمع الجديد يندهش لعدم وجود طوابير او زحام ووجود عدد كبير من الموظفين والشبابيك .

بسيط : صباح الخير ..عاوز اطلع جواز سفر ومعايا الاوراق اهه.

الموظف : صباح النور يا فندم ..حط الاوراق فى فتحة الماكينة اللى جمب الشباك واتفضل استريح.

بسيط ينظر بجوار الشباك ويجد فتحة ..وضع فيها الاوراق فقامت الماكينة بسحبها على الفور.. وبسيط مندهش وسعيد وتخيل جواز السفر وهو يخرج من نفس الفتحة بعد قليل…. وذهب لينتظر على كرسى مجاور .

الموظف فى الميكروفون : الاستاذ بسيط مواطن بسيط… يتفضل على شباك 3 للاهمية.

بسيط يسمع اسمه يجلجل فى الاذاعة الداخلية للمجمع الجديد فيذهب مسرعا للموظف .

الموظف : فى مشكلة صغيرة.

بسيط : خير فى ورق ناقص ولا حاجة.

– الموظف : لا لا كله تمام…. بس مدام إعتدال كانت عامله عملية انزلاق غضروفى من عشر سنين.

بسيط : ……؟!!!!

– الموظف : الحقيقة المشوار تعبها جدا فا قدمت إلتماس.. وكذا موظفه تانية عندهم ظروف مشابهه على كام موظف مسن…قدموا كلهم إلتماسات بعد ما عرفوا ان مدام إعتدال قدمت إلتماس…. فمساعد الوزير قرر انه يفتحلهم المجمع القديم تانى يقعدوا فيه..

بسيط : !!!!! انا مالى بالقصة دى حضرتك يعنى ؟؟؟

الموظف : لا ابدا ولا حاجه …حضرتك بس هترجع المجمع القديم تمضى الورقة دى من مدام اعتدال وتجيلى تانى.

– بسيط :_________________________________________(ده كان اخر رسم قلب له

نوادر المواطن بسيط من تأليف المهندس والفنان م/ احمد عصمت.

مؤلف معتمد في موقع ابلة ظاظا – ممنوع منعا باتا النقل او الاقتباس.